Framan við gamla Héraðskólann í Reykholti er stytta af Snorra Sturlusyni eftir Gustav Vigeland. Norðmenn færðu Íslendingum styttuna að gjöf árið 1947 er Ólafur Hákonarson, þá krónprins Norðmanna, heimsótti Reykholt.

Reykjaholtsmáldagi er færður með nokkrum rithöndum á alllöngu tímabili, og munu elstu ákvæðin skráð um miðja 12. öld. Neðarlega á síðunni kemur Snorri Sturluson við sögu:

"Skrín það er stendur á altari með helgum dómum gefa þeir Magnús (þ.e. Magnús Pálsson prestur í Reykholti) og Snorri að helfingi hvor þeirra, og er þetta kirkjufé um fram of það er áður er talið. Kirkja á enn um fram klukkur þær er þau Snorri og Hallveig leggja til staðar..." Þess hefur verið til getið að Snorri hafi með eigin hendi skrifað þennan hluta máldagans.   (Þjóðskjalasafn Íslands)

Alkunna er að Reykholt í Borgarfirði er einn merkasti og þekktasti sögu- og minjastaður á Íslandi. Má rekja það til þess að þar bjó um skeið Snorri Sturluson sagnaritari (1179-1241) og þar var hann veginn sem frægt er. Snorri Sturluson felldi mikinn hug til staðarins" segir í Sturlungu. Í Reykholti hefur verið kirkja og prestsetur um aldabil og margir kunnir klerkar setið staðinn, sem löngum var auðugur að eignum og ítökum. Í Reykholti er að finna einhverjar merkustu fornminjar hér á landi, Snorralaug. Þá má nefna að frá Reykholti er elsta skjal íslenskrar kirkju sem til er, Reykholtsmáldagi, talið frá síðari hluta 12. aldar. Er máldaginn varðveittur í Þjóðskjalasafni Íslands. Þúsundir ferðamanna, innlendra sem erlendra, sækja Reykholt heim á hverju ári, sérstaklega að sumarlagi. Af útlendum þjóðum hafa Norðmenn sýnt Reykholti einstakt dálæti vegna Snorra Sturlusonar og margsinnis sýnt hug sinn í verki með rausnarlegum gjöfum og fjárframlögum til uppbyggingar á staðnum.